प्रथम फेन्सिङ च्याम्पियनसिप हुने

नेपाल फेन्सिङ संघको आयोजनामा प्रथम फेन्सिङ च्याम्पियनसिप यहि आउँदो असार २ र ३ गते त्रिपुरेश्वरस्थित राष्ट्रिय खेलकुद परिषद्को कर्भडहलमा हुने भएको छ । ओलम्पिक डे २०१६ को अवसर पारेर च्याम्पियनसिप आयोजना गर्न लागेको संघले जनाएको छ।
च्याम्पियनसिपका लागि सम्पूर्ण तयारी पुरा भइसकेको फेन्सिङ संघका महासचिव सुजनलाल श्रेष्ठले बताए ।
नेपालमा फेन्सिङको राष्ट्रिय च्याम्पियनसिप पहिलो पटक हुन लागेको हो । च्याम्पियनसिपमा महिला र पुरुषका सात टिमको सहभागी हुने निश्चित भएको छ । सहभागी हुने टिमहरुमा शसस्त्र प्रहरी बलको एपिएफ टिम, त्रिभुवन आर्मी क्लब, धापासी फेन्सिङ एकेडेमी, शिवपुरी मावि, कास्की जिल्ला फेन्सिङ टिम, कञ्चनपुर जिल्ला फेन्सिङ टिम, काँडाधारी क्लब रहेको छ ।
च्याम्पियनसिपमा दुई विधामा प्रतिस्पर्धा गराइने छ । इपि र फोइल विधातर्फ प्रतिस्पर्धा गराइने श्रेष्ठले बताए । समूह र व्यक्तिगत इभेन्टमा प्रतिस्पर्धा हुने छ । पुरुष र महिलाको टिमको विजेतालाई ट्रफी, मेडल र प्रमाणपत्र प्रदान गरिने छ । प्रतियोगितामा जम्मा ८० जना खेलाडीले प्रतिस्पर्धा गर्ने छन् ।
यस अघि नेपाल फेन्सिङ संघले काठमाडौं, पोखरा, शसस्त्र प्रहरी बल, नेपाल आर्मी, शिवपुरी स्कुललगायतका क्षेत्रमा विभिन्न प्रतियोगिता आयोजना गर्दै खेलाडीको स्तरबृद्धि गर्दै आइरहेको संघका अध्यक्ष सुनिल श्रेष्ठले बताए । पहिलो चरणमा संघले खेलाडी, प्रशिक्षक र रेफ्रीलगायतका प्राविधिकहरु उत्पादनमा ध्यान दिएको र अब संघले राष्ट्रिय तथा अन्य च्याम्पियनसिपहरु व्यापक रुपमा आयोजना गर्ने लक्ष्य लिएको उनले बताए । यसै सन्दर्भमा यस पटक ओलम्पिक डेको अवसर पारेर पहिलो राष्ट्रिय फेन्सिङ च्याम्पियनिसप आयोजना गर्न लागेको हो ।