प्रोफेसनलमा रुपक च्याम्पियन

पोखराका रुपक नेपाली प्रथम के ब्याग मुवाँथाई प्रतियोगिताको पुरुष ७० केजीमुनि (प्रोफेसनल) तर्फ शनिबार च्याम्पियन बनेका छन् ।
त्रिपुरेश्वरस्थित राष्ट्रिय खेलकुद परिषद्को कभर्डहलमा भएको फाइनलमा रुपकले नेपाल आर्मीका चित्रसिं ठकुरीलाई पराजित गरे । भाटभटेनी क्लबका मन्दिप राना मगर तथा सिन क्योकुसिनका सन्तोषकुमार लामा संयुक्त रुपमा तेश्रो भए । पहिलो हुनेले ५० हजार, दोश्रोले २० हजार तथा तेश्रो हुनेले समान ७ हजार ५ सय नगद पुरस्कार हात पारे ।
नेपाल राष्ट्रिय मुवाथाई संघ र के ब्याग स्पोर्ट्स प्रा.लि. द्वारा संयुक्त आयोजित प्रतियोगिताको पुरुष ५५ केजीमुनि आर्मीका मदनकुमार श्रेष्ठ पहिलो भए । उनले फाइनलमा सिन क्योकुसिनका नदाप हुसेनलाई हराए । क्योकुसिन बुदोकाइका ऋतिक मगैया र भाटभटेनीका अमित ठकुरी तेश्रो बने ।
पुरुष ६० केजीमुनि जावलाखेलका सागर दर्जी पहिलो, पोखराका विजय सिम्खडा दोश्रो तथा चाल्नाखेलका सनिश लामा र केन्द्रीय क्लबका करण वज्राचार्य तेश्रो भए । ६५ केजीको उपाधि आर्मीका पदम राईले जिते । उपाधि भिडन्तमा उनले जावलाखेलका सरोज सेवालाई पाखा लगाए । सातदोबाटोका मदन तामाङ र केन्द्रीयका विवेक गदाल तेश्रो स्थानमा रहे ।
प्रतियोगितामा समावेश महिलाको एक मात्र स्पर्धामा भाटभटेनीकी सविना श्रेष्ठ पहिलो भइन् । ५५ केजीमुनिको फाइनलमा सविनाले केन्द्रीयकी करुणा उप्रतीलाई निराश पारिन् । सिन क्योकुसिनकी विनिता राई र आर्मीकी सर्मिला राई तेश्रो भए । चार स्पर्धाका विजेताले १० हजार, उपविजेताले ५ हजार तथा तेश्रो हुनेले २ हजार ५ सयका दरले नगद पुरस्कार पाए ।
विजेतालाई सशस्त्र प्रहरी बलका महानिरीक्षक दुर्जकुमार राईलगायतले एक कार्यक्रमबीच पुरस्कार वितरण गरे । दुईदिने प्रतियोगितामा विभिन्न ५ स्पर्धामा ४० खेलाडीले सहभागिता जनाएको आयोजक मुवाँथाई संघका अध्यक्ष गणेश कक्षपतिले जनाएका छन् ।