राखेपद्वारा १३औं सागको खर्च विवरण सार्वजनिक

राष्ट्रिय खेलकुद परिषद्ले गत बर्ष आयोजना भई ऐतिहासिक सफलता पाएको १३ औं दक्षिण एशियाली खेलकुद (साग)को खर्च विवरण आईतबार सार्वजनिक गरेको छ ।
राखेपका सदस्य सचिव रमेश कुमार सिलवाले पत्रकार सम्मेलनका विच १३ औं सागको आम्दानी तथा खर्चको विवरण प्रस्तुत गरेका हुन् ।
जसअनुसार साग खेलकुद तर्फ १ अर्व ३१ करोड ७८ लाख ४३ हजार ६१ रुपैया, पूर्वाधार तर्फ सागकै तयारीका क्रममा विगत देखि हालसम्म २ अर्व ८६ करोड १४ लाख २८ हजार ९७३ खर्च भएको छ । यस्तै पदक विजेता खेलाडी, प्रशिक्षक र संघहरुका लागि सरकारबाटनै २२ करोड ७६ लाख खर्च भएको छ ।
साग प्रतियोगिता आयोजना गर्नका लागि विज्ञ टोलीले ५ अर्व ६९ करोड प्रस्तव गरिएकोमा सरकार बाट ३ अर्व ६५ करोड विनियोजन भएको थियो ।
परिषद्ले प्रस्तुत गरेको खर्च विवरणमा आम्दानी तर्फ सरकारबाट प्राप्त १ अर्व २२ करोड १८ लाख ४८ हजार, टिकट विक्रीबाट २ करोड ६७ लाख ११ हजार ६७५, बिज्ञापनबाट २० लाख ९ हजार ९१५ र सहभागी राष्ट्रबाट ११ करोड २१ लाख ३५ हजार ५९८ रुपैया रहेको छ ।
यसैगरि खर्च तर्फ संलग्न विवरण अनुसार १ अर्व ३१ करोड ७८ लाख ४३ हजार ६१ रुपैया, बैंक मौज्दात ३ करोड ५५ लाख ७१ हजार १३७ र १ करोड ९३ लाख ८० हजार २२४ रुपैया फ्रिज भएको रहेको छ ।
साग प्रतियोगिताकै क्रममा दाता निकायबाट ४ करोड ८१ लख ३० हजार भौतिक सहयोग प्राप्त भएको छ । जसमा ब्याडमिन्टन, कबड्डी, बास्केटबल, टेवलटेनिस म्याट, पदक र केहि खेल किड्स रहेका छन् ।
राखेपले ३ महिना भित्र खर्च सार्वजनिक गर्ने भनेकोमा यती ढिलो गरि किन भएको भन्ने पत्रकारहरुको प्रश्नमा राखेप सदस्य सचिव सिलवालले विभिन्न स्थानमा खेल भएका र कोरोनाका कारण समयमानै खर्च विवरण प्राप्त नभएको साथै सहभागी राष्ट्रहरुबाट पूर्ण विवरण प्राप्त नभएका कारण केहि ढिला हुन गएको जानकारी गराए ।
पहिलो र आठौं दक्षिण एशियाली खेलकुदलाई सफलतापूर्वक सम्पन्न गरिसकेको नेपालले २०७६ मंसिर १५ देखि २४ गते सम्म १३ औं दक्षिण एशियाली खेलकुदलाई ऐतिहासिक उपलब्धीसंगै पूर्णता दिएको थियो । जसमा नेपालले ५१ स्वर्ण, ६० रजत र ९६ कास्य गरि कुल २०७ पदक हात पारेको थियो ।