राष्ट्रिय खेलकुद प्रतिभा सम्मानमा साग पदक विजेताको वर्चस्व

काठमाडौं, साउन २८ गते ।
अन्तर्राष्ट्रिय युवा दिवसका अवसरमा विभिन्न ७ खेलका उत्तिनै खेलाडी, दुई प्रशिक्षक र एक राष्ट्रिय खेल संघसहित १० लाई राष्ट्रिय खेलकुद प्रतिभा सम्मानबाट शुक्रबार सम्मानित गरियो । सातमा चार खेलाडी १२ औं दक्षिण एसियाली खेलकुद (साग) का पदक विजेता रहेका छन् ।
सम्मानित हुने खेलाडीहरुमा उसुकी निमा घर्ती मगर, जुडोकी फुपु ल्हामु खत्री, फुटबलका नवयुग श्रेष्ठ, क्रिकेटका सन्दिप लामिछाने, एथलेटिक्सकी विपना परियार, पौडीकी गौरिका सिंह तथा तेक्वान्दोकी निशा रावल रहेका छन् ।
निमा र फुपुले १२ औं सागमा स्वर्ण जितेका थिए । १२ औं सागमा २३ वर्षपछि नेपालले फुबटलमा स्वर्ण जित्दा टोलीका सदस्य नवयुगले महत्वपूर्ण भूमिका निर्वाह गरेका थिए । सन्दिपले विभिन्न प्रतियोगितामा उत्कृष्ट प्रदर्शन गरेका थिए भने विपनाले गत जेठमा राजधानीमा भएको आठौं राष्ट्रपति रनिङ सिल्ड खेलकुद प्रतियोगितामा दुई विद्यालयस्तरीय कीर्तिमानसहित ४ स्वर्ण जितेकी थिइन् ।
रियो ओलम्पिक– २०१६ कै कान्छी खेलाडी गौरिकाले १ रजत र ३ कास्य जित्दै सागको पौडीतर्फ व्यक्तिगत स्पर्धामा पदक जित्ने पहिलो खेलाडी बन्न सफल भएकी थिइन् । निशा ‘वाइल्ड कार्ड’ मार्फत रियो ओलम्पिकका लागि छनोट भएकी खेलाडी हुन् ।
पारा खेलकुदको प्रशिक्षण, प्रतियोगिता सञ्चालन तथा व्यवस्थापन गर्दै आएका पारा खेलकुद प्रशिक्षक कुमार पौडेल र १२ औं सागमा सहभागी नेपाली खोखो टिमका मुख्य प्रशिक्षक रामनारायण राय पनि सम्मानित भए । उत्कृष्ट खेल संघका रुपमा नेपाल ट्रायथलन संघलाई पुरस्कृत भयो ।
युवा तथा खेलकुद मन्त्रालय र राष्ट्रिय युवा परिषद्ले कमलादीस्थित प्रज्ञा भवनमा आयोजित एक विशेष समारोहबीच राष्ट्रपति विद्यादेवी भण्डारी र खेलकुद मन्त्री दलजीत श्रीपालीले सम्मानित सबैलाई सम्मान पत्रका साथै जनही १ लाख रुपैयाँ प्रदान गरे । कार्यक्रममा गौरिका, फुपु र सन्दिप उपस्थित थिएनन् ।
कार्यक्रमलाई सम्बोधन गर्दै राष्ट्रपति भण्डारीले मुलुको आर्थिक र सामाजिक विकासका लागि युवाहरुलाई परिचालित गर्नुपर्नेमा जोड दिदै गत वर्षको विनाशकारी भूकम्पले ल्याएको क्षतिको पुर्ननिर्माणमा पनि युवाहरुको सशक्त पहलकद्मी र परिचालन त्यत्तिकै खाँचो रहेको बताइन् ।
सोही कार्यक्रममा विभिन्न १० विधामा राष्ट्रिय युवा प्रतिभा सम्मान पनि प्रदान गरिएको थियो । उक्त १० विधामा सम्मानित हुनेले पनि जनही १ लाख र सम्मान पत्र पाए ।
स्वयंसेवा र समाजसेवामा धुर्मुस सन्तली फाउन्डेसन, व्यवसायिक कृषिमा पैचौ पसल प्रा.लि., गुल्मी, वातावरण, सरसफाइ तथा स्वयंसेवामा डा. राजु अधिकारी, चित्रकला र संगीतमा दुवै हात र खुट्टा नचल्ने अमिर लामा, कला र संगीतमा गायक शिव परियार, कृषि (फलफुल) मा लोचन बस्नेत, चेलीबेटी बेचविखन नियन्त्रणमा माइती नेपालीकी फुलमाया तामाङ, कृषि (पशुपालन) मा दीपक तिमिल्सिना, कला र संस्कृतिमा कालो पोथी चलचित्रका निर्देशक मीनबहादुर भाम तथा वैज्ञानिक खोज अनुसन्धानमा डा. सुमन सत्याल पुरस्कृत भए ।
सन् १९९९ मा संयुक्त राष्ट्र संघको ५४ औं साधारणसभाले युवाको सवाललाई सम्बोधन गर्ने उद्देश्यले हरेक वर्षको अगष्ट १२ तारिखका विश्वभर अन्तर्राष्ट्रिय युवा दिवस मनाउने निर्णय गरेको थियो । नेपालमा सन् २००४ देखि यो दिवस मनाउन थालिएको हो ।